Hagnýtar upplýsingar um val nemenda
Skólaárið 2025 – 2026 verður boðið upp á fjölbreytt úrval valgreina og von okkar er sú að allir geti fundið sér áhugaverðar og spennandi greinar. Það er mikilvægt að nemendur ræði hugmyndir sínar við foreldra eða forráðamenn, velji eftir eigin sannfæringu og séu sjálfstæðir í því sem þeir velja.
Hafið í huga að valgreinar eru jafn mikilvægar og aðrar námsgreinar í skólanum. Kröfur um ástundun og árangur eru jafn miklar og í öðrum greinum.
Flestar greinar eru opnar fyrir nemendur í 8., 9. og 10. bekk en þó eru nokkrar einungis fyrir 9. og 10. bekk. Vinsamlegast hafið það hugfast þegar þið skoðið hvað er í boði.
Hver grein er kennd tvær kennslustundir á viku. Nemandi velur núna fyrir næsta haust og svo verður valið aftur í byrjun desember fyrir vorönnina. Hver nemandi í 8. – 10. bekk þarf að skila 37 kennslustundum á viku, þar af eru 6-8 kennslustundir af þessum 37 kenndar í valgreinum.
Ekki er víst að hægt verði að verða við öllum óskum nemenda um valgrein. Greinar geta fallið niður vegna lítillar þátttöku eða annarra ófyrirséðra aðstæðna. Einnig getur komið fyrir að fleiri sækja í greinar en hægt er að koma að. Því þurfa nemendur að merkja við sex valgreinar á valblaðinu. Þeir merkja nr. 1 við þá valgrein sem þeir hafa mestan áhuga fyrir, nr. 2 þá sem þá langar næst mest í o.s.frv.
Samvalsgreinar eru þær valgreinar kallaðar sem eru kenndar sameiginlega fyrir nemendur úr öllum skólum bæjarins víðsvegar um bæinn. Gert er ráð fyrir að nemendur nýti sér strætisvagna til að koma sér á milli staða.
Eftir fyrstu 1-2 vikurnar í valgrein getur verið mögulegt að skipta um grein en þó er slíkt alltaf háð aðstæðum í hverju tilviki fyrir sig.
Eftir þann tíma er ekki hægt að skipta milli greina.
Nemendur eiga kost á að fá nám við sérskóla metið sem og ýmiskonar félags- og/eða íþróttaiðkun eða þjálfun:
- Einfalt metið val samsvarar tómstundastarfi 1-5 klst. á viku.
- Tvöfalt metið val samsvarar iðkun frá og með 5 klst. á viku í einni íþrótt/félagsstarfi eða þátttaka í tveimur aðskildum íþróttum/félagsstarfi.
- Einnig geta nemendur fengið fjarnám við framhaldsskóla metið.
- Nemendur í 10. bekk geta sótt um að fá þátttöku í atvinnulífi metna sem eina valgrein.
Til staðfestingar þátttöku í metnu vali þarf að skila staðfestingu á ástundun í jan/feb á þar til gerðu eyðublaði.
Athugið að metið val má að hámarki koma í stað 4 kest. á viku.
Foreldrar bera allan kostnað af tómstundastarfi sem óskað er eftir að fá metið með þessum hætti.
Nemendur og foreldrar bera fulla ábyrgð á iðkun í metnu vali og skilum á staðfestingu til að starfið fáist metið. Ef breyting verður á, eða nemendur hætta að iðka þá tómstund sem metin er ber að tilkynna það strax til skóla til að hægt sé að bæta inn valgrein strax.
Valinu fyrir vorönnina 2026 þarf að skila inn í síðasta lagi föstudaginn 12. desember 2025. Ef einhverjar spurningar vakna þá er velkomið að hafa samband við Lilju Friðriksdóttur deildarstjóra (liljaf@glerarskoli.is), sími skólans er 461-2666.
Smelltu hér til að velja valgreinar
Félagsmiðstöðvarval
Báðar annirFélagsmiðstöðvarval
Miðvikudagur kl. 13:55 - 15:15
📖 Lýsing
Valgrein fyrir þau sem vilja skipuleggja og stýra starfi félagsmiðstöðvarinnar. Skipuleggja viðburði, auglýsa þá og stjórna þeim, með það að markmiði að styrkja og efla starfsemina í samræmi við þarfir unglinganna. Einnig að koma með hugmyndir fyrir starfsemi félagsmiðstöðva hjá miðstiginu.
Nemendur fá fjölbreytta fræðslu og leiðsögn með það að markmiði að styrkja sjálfsmynd þeirra, sjálfstraust og lýðræðislega þátttöku. Gert er ráð fyrir að nemendur taki þátt í umræðum og skemmtilegum hópeflisleikjum sem stuðla að félagslegri virkni og samvinnu.
Markmiðið er að skapa umhverfi þar sem unglingar læra að segja sína skoðun, hafa trú á sjálfum sér, virða mismunandi sjónarmið og taka ábyrgð.
Þessi valgrein er mikilvæg fyrir þau sem vilja stuðla að jákvæðu og uppbyggilegu umhverfi í eigin félagsmiðstöð og auka þátttöku sína í lýðræðislegum og samfélagslegum verkefnum.
📝 Námsmat
Ástundun, virkni og vinnusemi metin.
Fiðringur
Báðar annirFiðringur
Fimmtudagur kl. 13:15 - 14:35
📖 Lýsing
Nemendur skipuleggja og semja atriði fyrir hæfileikakeppni grunnskólanna á Akureyri sem ber heitið Fiðringur. Nemendur í 8., 9. og 10. bekk fá að taka þátt. Í þessu felst undirbúningur og æfingar fyrir lokasýningu í Hofi að vori. Nemendum gefst tækifæri til að hanna búninga, sviðsmynd, tónlist, dans og fleira.
📝 Námsmat
Ástundun, virkni og vinnusemi.
Frístund
Báðar annirFrístund
Mánudagur kl. 13:15 - 14:35
Þriðjudagur kl. 13:15 - 14:35
Miðvikudagur kl. 13:55 - 15:15
Fimmtudagur kl. 13:15 - 14:35
Föstudagur kl. 13:15 - 14:35
📖 Lýsing
Nemendur aðstoða í Frístund einn dag í viku e.h. í 80 mín. Nemendur fá að kynnast leik og starfi barnanna í Frístund og vera starfsfólki innan handar við öll þau störf sem falla til innan Frístundar, s.s. að sinna börnum í leik og starfi úti og inni, tiltekt, aðstoð í kaffitímum o.fl.
📝 Námsmat
Áhugi, frumkvæði og virkni.
Heimilisfræði og bakstur
Báðar annirHeimilisfræði og bakstur
Fimmtudagur kl. 13:15 - 14:35
📖 Lýsing
Markmiðið með þessari valgrein er að nemendur auki þekkingu og leikni sína í heimilisstörfum og efli sjálfstæði, samstarfsvilja og samábyrgð.
Kennd verða undirstöðuatriði næringar- og matvælafræði, lögð áhersla á góðar umgengnisvenjur og borðsiði og athygli nemenda vakin á mikilvægi hreinlætis almennt.
Í valgreininni er annars vegar lögð áhersla á matargerð og matarmenningu og hins vegar á bakstur og mismunandi bakstursaðferðir (s.s. þeytt, hrært og hnoðað deig).
Ýmsu fræðilegu efni sem tengist matargerð og heimilishaldi er fléttað inn í verklegu tímana.
📝 Námsmat
Ástundun, virkni og vinnusemi.
Íþróttaval
Báðar annirÍþróttaval
Mánudagur kl. 13:15 - 14:35
📖 Lýsing
Fjölbreyttir tímar þar sem teknar eru fyrir helstu íþróttagreinar: fótbolti, handbolti, körfubolti, blak, bandý og badminton. Nemendur fá tök á að skipuleggja og stjórna einum tíma í samráði við kennara.
📝 Námsmat
Frammistaða í tímum, virkni, áhugi og ástundun.
Nemendaráð
Báðar annirNemendaráð
Þriðjudagur kl. 13:15 - 14:35
📖 Lýsing
Hlutverk nemendaráðs Glerárskóla er m.a. að skipuleggja félagsstarf í skólanum, gæta að hagsmunum nemenda, miðla upplýsingum milli nemenda og stjórnenda skólans og skipuleggja og taka þátt í viðburðum sem fram fara á skólaárinu.
Nemendaráð eru fulltrúar og raddir annarra nemenda gagnvart stjórn skólans og skólayfirvöldum og því er mikilvægt að í nemendaráði sitji ábyrgir nemendur sem sýni af sér góða hegðun, frumkvæði í vinnubrögðum, stundi námið vel og hafi góða skólasókn.
Nemendur vinna mikið í hópum og kynna hugmyndir sínar. Þeir læra að setja upp viðburði, auglýsa þá og stjórna þeim. Unnið verður markvisst að framsögn, fundarsköpum, eflingu sjálfsmyndar og lýðræðislegum vinnubrögðum. Nemendur sem eru í nemendaráði er skylt að vinna á viðburðum sem haldnir eru í skólanum.
Áætlað er að nemendaráð taki virkan þátt í starfi skólans og taki á móti skólaheimsóknum fyrir hönd Glerárskóla. Fulltrúi frá nemendaráði situr fundi í skólaráði. Fundir með stjórnendum fara fram tvisvar yfir skólaárið, einn á hvorri önn.
📝 Námsmat
Ástundun, virkni og vinnusemi metin.
Skólablað og útskriftarbók
VorSkólablað og útskriftarbók
Fimmtudagur kl. 13:15 - 14:35
📖 Lýsing
Í þessum tímum fá nemendur að setja á fót skólablað í Glerárskóla.
Nemendur fá tækifæri til að skrifa um ýmis málefni innan sem utan skólans og segja skoðanir sínar á málefnum sem brenna á þeim. Auk þess fá nemendur í 10. bekk tækifæri til að vinna í útskriftarbók árgangsins með það að markmiði að gera hana eins veglega og kostur er.
Valgreinin hentar vel þeim sem vilja æfa sig að setja upp og skrifa ýmsa texta: fréttir, skoðanir, gagnrýni og allt sem þeim girnist auk þess að æfast í gagnrýnni hugsun. Útgáfuform fer eftir dugnaði og hugmyndaauðgi nemenda sem munu fá eins frjálsar hendur og unnt er í þessari vinnu.
📝 Námsmat
Ástundun og virkni.